كل سنه وانتم طيبين

كل سنه وانتم طيبن يا جماعه

بمناسبه عيد الاضحى

والسنه الجديده 2008

يا رب تكون سه سعيده عليكم كلكم

طبعا أنا عايز اقول أنى حتوقف عن الدخزا فى المدونه لظروف غامضه

وهى الامتحانات

أصبحت اكثر غموضا دلوقتى

يلا سلااااااااااااااام

نتقابل تانى 22 يناير

عمرو مصطفى

لو فى حياتى

مع المطربه المجريه أورشى

تحياتى لك يا عمرو على الكليب والاغنيه الجميله جدا

اللحن بتاعك ماشى على صوتك وعليك اجمل مليون مره من حسام حبيب فى اغنيه انت معايا

اغنيتك مستواها عالى جدا

حوار عمرو مصطفى مع عمرو أديب ومعه المطربه اورشى

الجزء الاول

اكتشاف مزهل عن طبيعه المصريين

نقلا عن الصحفى بجريده الاخبار:محمد عبد المنعم

نتائج مزهله توصلت اليها احصائيه عالميه اجرتها شركه أبحاث دوليه هى شركه (ج.اف.روبر)جرت خلالها لقاءات شخصيه مع اكثر من 39 ألف شخص فى 31دوله من بينهم مصر .

كان محور الاسئله يدور حول مخاوف الانسان فى مرحله العمر المتقدمه و الشيخوخه

وأظهرت النتائج أن :

الالمان يخافون من فقدان الذاكره والوعى العقلى

الهولنديون يخافون من السمنه وزياده الوزن

الامريكان من اشياء عديده منها فقدان الحيويه وفقدان الزاكره وزياده الوزن!!!!!

البرازيل يخافون من فقدان القدره الجنسيه وسقوط الاسنان

بلجيكا من كبح الشهوات فى مقدمتها الشهوه الجنسيه

الهند من سقوط الشعر!!!!!!.غريبه اوى الناس دى

تايلاند يخافون ضعف البصر

مصر كانت هنا النتائج المزهله للجميع وهى انالمصريين لايهابون ولا يخافون ولا يكترثون بالمره بهذا المصير الانسانى المحتوم

يقول ديان جريسيبل رئيس تحرير هذه الوكاله أن المصريين أكثر تحضرا وملائمه للمقاييس والمعايير من الكثير من شعوب العالم الغربى

وان النتائج البحث تشير الى ان المصريين لديهم من الامكانيات ما يحميهم من مثل هذه المشكله .

أما ميشيل جوسمانو مدير مشروع مدن العالم أن المصريين ربما كانوا يؤمنون بأن مشاكل التقدم فى العمر هى من الامور الحتميه وطالما انها حتميه فلما القلق

دى قليل من المقاله الجميله جدا

لعل الغرب الان اقتنع بأن الاسلام هو افضل اديان الارض على الاطلاق وانها ديانه تساعد على تعايش الانسان فى المجتمعات المتقدمه وتواكب العصر الحديث لأن ثقافه المصريين اساسها الاول الثقافه الأسلاميه

كل سنه وأنت طيبين بعد شويه حيكون أخر فطار فى رمضان ويبقى كده دخلنا اتممنا رمضان

يارب نكون عملنا اللى عايزينه فى رمضان واستفدنا من اللى عايزينه من منه

أنا بس حابب أقول كل سنه وانت طيببين

أنا بقى خلاص أخد العيديه ألبوم رائع وجميل جدا جدا لمحمد فؤاد

أنا مش قادر أقول قد ايه انا سعيد بالالبوم ده الراجل ده ليه حته لوحده بيغنى فيها

محدش بيقرب منها

بجد يا جماعه اسمعوا الالبوم ده فيه كلمات والحان تحفه

تحياتى لمحمد فؤاد على الالبوم الرائع بس يارب ما يتأخرش كده مش كل 3سنين

هى الاغانى باين فيها الشغل والتعب بس برده 3سنين كتير

وعايزكم تقولو رأيك فيه فى الاستفتاء اللى فى الجنب ده

يلا كل سنه وانتم طيبين

أغانى دينيه

أغنيه بالعقل والاحساس لعمرو مصطفى

أغنيه محمد فؤاد

اغنيه هشام عباس -أسماء الله الحسنى

خلقتنى حماده هلال

أغنيه محمد نابينا -حماده هلال

حماده هلال يؤذن0جميله اوى

اغنيه يانور على نور -عمرو دياب

دعاء جميل اوى لعلاء ولى الدين قبل وفاته - رحمه الله

اغنيه خليها على الله - اصاله نصرى

أصحاب أنا وانت ولا

أوقات بيبقى الواحد فى حاله غريبه جدا عايز يتكلم كانه ما محركش لسانه من سنين

عنده مواضيع وحكايات عايز يتكلم مع حد يكون هو اللى يقدر يسمعه هو اللى يقدر يفهمه هو الل يقدر يحس بيه وهو اللى يقدر يدى له حل

احيانا بتبقى مواضيع صعب يحكيها لحد أصلا بس محتاج يتكلم يصرخ يطلع اللى جواه

ولما اللى جواه بيطلع بيحس انه استريح وان فى هم اتشال من عليه مع ان الكلام ممكن ما يكونش حل المشكله خالص بس الكلام لوحده نعمه

بس مين اللى يسمعك ويحسك ويحبك ويديك رأى ونصيحه

مش حتلاقى فى حياتك غير واحد أو اتنين تقدر تتكلم معاهم من اصحابك

والباقى ممكن يكون واحد رايح جاى معاك وانت فى واد وهو فى واد تانى

وممكن يكون واحد بتشوفه كل فين وفين ومن يومين تعرف اللى حصله ويعرف اللى حصلك فى الشهور اللى فاتت كلها لأنك حاسه وحبه وفاهمه

لو لقيت الانسان ده فى حياتك امسك فيه وأوعى تفرط فيه

خليك صبور معاه ..متنساش مافيش فى حياتك حد يفهمك غير واحد أو اتنين

مافيش حد فى حياتك مش ممكن ما تختلفش معاه بس فى الاخر برده هو ده ومافيش غيره

ضايعين ....ضايعين

يا حبيبتى يا مصر....يامصر

يا حبيبتى يامصر

يامصر

رمضان كريم والعام الدراسى الجديد

كل سنه وانتم طيبين يا جماعه

رمضان شهر الخير والحب والتسامح ....فعلا هو أجمل شهر فى السنه كلها

بس فى حاجه مهمه بقى فى ناس من ديانات أخرى أو واحد زى عبد الكريم قال على شهر رمضان شهر نفاق لأنك فى رمضان حاجه وبعد رمضان حاجه تانيه...طبعا ده غباء لان النفاق مش حينسب للشهر الكريم ينسب لينا لاننا بننزل جامد بعد رمضان .

لكن الطبيعى أن الواحد بيزود من عباداته فى رمضان اذا كان سيدنا محمد عليه الصلاه والسلام فى رمضان مش بينام لانه كان بيقول مافيش وقت للنوم

الشهر ده هو مجمع الحسنات والبدايه

ياريت يا جماعه بعد رمضان نستمر فى نفس الروحانيات والايمان العالى لأن ده المفروض فى رمضان وبقيت السنه

الدراسه بقى

طبعا أول شهر كده فى الدراسه اوت أجازه أجازه حنروح نشوف الكليه كده نظامها أيه

حبقى أعمل بوست تهنئه للعام الدراسى الجديد بعد رمضان

بس على فكره غالبا امتحانات

mid tearmبعد العيد الصغير

خلى بالك

كليه الهندسه الالكترونيه

هذه كليتى

كليه الهندسه الالكترونيه بمنوف

فى البدايه أحب اوضح أن الكليه دى مختلفه عن باقى كليات الهندسه فى مصر وربما كما يقولون لنا انا غير متأكد أنها فريده من نوعها فى الشرق الاوسط طبعا ده لأن الشرق الاوسط بحاله مش عارف يعمل كليه زيها بس عشان هى متخصصه فى الكهرباء الالكترونيه وليست الكهرباء العاديه وبالتالى فهى لا تخضع للتوزيع الجغرافى

كليه الهندسه الالكترونيه مقسمه الى ثلاث اقسام هم تحكم واتصالات وحاسبات

والتخصص يبدأ من سنه ثالثه يعنى بعد ثلاث سنين فى الكليه وده راجع لأن الاقسام الثلاثه مشتركين فى نفس المواد والثلاثه اقسام متفرعين من قسم كهربا

الميزه الكبرى فى الكليه دى أن المتخصص فى قسم من السهوله ان يعمل فى مجال القسم الاخر بسهوله يعنى اللى فى تحكم ممكن يشتغل فى اتصالات وحاسبات والعكس طبعا

ملحوظه برده فى الكليه انها واسعه جدا وكبير أووى فيها مبنين كل واحد فيهم مجمع سكنى لوحده

الكليه فيها نشاطات ولكنها لا تحظى بالاهميه التى تستحقها وان شايف انها اكبر عيوب الكليه

أنا السنه الجايه انشاء الله حبقى فى تالته واخترت قسم تحكم وربنا يسهل ويبقى قسم كويس وعملى زى مأنا سمعت

فى النهايه أحب اشكر كل الداكتره المحترمين لأنهم بيتعبوا معانا أوى وبجد داكتره جامده أوى

هى دى مصر....وراء الشمس

يااااااااااااااااااااااه هى دى بقى مصر أم الدنيا

ولا دى مصر المستعمره

ياترى لو انا ولا أنت اللى فى السجون المصريه ومت زيى الالوف اللى بيموتوا كل يوم البلد حتتحرك يعنى

عادى واحد من 75مليون حتفرق فى مصر يعنى

هى دى مصر للأسف

رامى صبرى

ح رامى ... ح رامى

بجد زهقت زهقت يعنى هو ابن عجب المتخلف ده اللى فى كنترول مزيكا مافيش فى دماغه غير رامى صبرى كل يوم يكتب ح رامى عمل ح رامى سوى ح رامى الشبيه بعمرو دياب

أنت يابن عجب فعلا مستفز ونفسك مريضه بمعنى الكلمه لما تتريق على واحد وتقول عليه ده فقر يا جماعه دى خاطبته ماتت قدامه وواخده بهزار تبقى فعلا نفسك مريضه وتحتاج لعلاج لما كل يوم تكتب عليه اشاعه شكل تبقى فعلا متخلف عقليا والمفرض تقعد فى بيتكم

أنا قولت مرتين تريقه على الراجل من حبك الزايد لعمرو دياب ودماغك التعبانه عشان ربطت بينهم لكن كل يوم لأ بقى ده ..... معلش يعنى

رامى صبرى مش شبه عمرو دياب غير فى الشكل والطله وجوده الاغانى يعنى عمرو ممكن يغنى أغانى رامى صبرى لكن الصوت ده فى حته وده فى حته تانيه خالص ودى مش غلطه رمى لأن شكله مش حيغيره عشان مايبقاش شبه عمرو بالعكس حاجه كويسه

أما جوده الاغانى فده فخر لأى حد انه يعمل اغانى ممكن عمرو يغنيها

الراجل ده ملحن أكتر من رائع واختيارته جميله جدا وصوته مميز وجديد يمكن يكون ليف مش أوى بس نفسه واسع يغنى الاغانى العاليه الطويله مستريح يعنى أحسن من مطربين كتير

يعنى بيطلع فى الكليب فى الضلمه عشان محدش يشوفه ويقول شبه عمرو أهو كليب واحد فى النور زى باقى الكليبات يعمل ايه يعنى

كفايه بقى ح رامى دى بقى لأن رامى ده احسن منك مليون مره

النادى الاهلى وعمرو دياب حاجه مصريه تشرف

تحيه فى البدايه للهضبه عمرو دياب على الكليب الجديد نقول ايه .. كليب جميل بس مش متميز واحنا متعودين من عمرو على التميز بس لو حاجه تحفه مش متميزه تبقى نزلت من مستوى عمرو دياب لكن ده لا يمنع ان الكليب تحفه

الحاجه التانيه الاساسيه

أنا بدعواكم جميعا لزياره مدونتنا الجديده 100سنه اهلى

المدونه اللى عملتها انا وأحمد(مداح القمر) ورضوى(دودى)وهى مدونه من اسمها عن الاهلى وبس

نوعد الجميع بأن المدونه سنسعى فيهاحتى تليق بأسم النادى الاهلى وتاريخه وحنكون محايدين وبعدين تماما عن التعصب الكروى

أدخلوا المدونه وانشاء الله تعجبكم

http://100el-ahly.blogspot.com/

ذكريااااااااااااات

كنت كاتب حاجه قديمه كده من حوالى 4شهور ومش فاكر ليه كتبتها أصلا بس كتبتها

ليه ياقلبى كل حاجه فينا باقت ذكريات

وكل ما حد يسألنى عنك أقوله كان

دا كان وكان وياما كا ن

كان ليه انسان حبه بحنان

ولما خانه وباعه زمان

حلف ليبكى بعده كتير

ويبكى قلب أى انسان

فكر يحب ويدى حنان

ويندمه على طيبه قلبه ويقوله يلا سلام

مالى جانا وقال بحبك نجرح وقالبه انكسر

مااحنا برده انجرحنا واللى كان فينااتحفر

ودا كان وكان وياما كان

كان ليه انسان حبه بحنان

ولما خانه وباعه زمان

حلف ليبكى بعده كتير

ويبكى قلب أى انسان

فكر يحب ويدى حنان

ويندمه على طيبه قلبه

حكايات وحكايات واللى جاى زكريات مافيش حكايه كامله ومش بتموت الذكريات

أحب بس أشكر أحمد _مداح القمر_لأنه كتب معايا مذهب الكوبليه التانى

comment

حابب بس أوضح حاجه صغيره على البوست اللى فات عشان حسيت أن أغلب الناس مافهمتش قصدى أنا بس كنت عايز كنت عايز أوضح أن المواد الصعبه بتعلى بالمستوى والمواد السهله بتنزل بالمستوى العام للمذاكره بس طبعا انا فرحان جدا بالنتيجه دى ..فرحان بجد والله

الخدعه

طبعا تكمله البوست اللى فات

أنا جبت جيد جدا الحمد لله

بس أنا لما عرفت أنى ماعدتش حتى 80فى الميه يعنى زعلت للحظات كده يعنى أنا كنت جايب امتياز فى الترم الاول والترم التانى نزلت جامد

الغريبه بقى أن المواد اللى جبت فيها امتياز هى اصعب مواد فى الكليه

يعنى ماده الماشين دى ماده معقده جدا والناس اللى جايبين فيها امتياز يتعدوا على الصوابع

أنا جبت فيها امتياز

والمواد اللى السهله اللى الناس كلها بتجيب فيها امتياز ألقيها جيد ولا حاجه

أنا حاسس ان الماده السهله بتنزل بالمستوى

والصعبه بأديها قيمتها

المفروض أدعى ان المواد كلها تبقى صعبه عشان أجيب تقدير

بس برده فى مواد بحبها فبجيب فيها تقدير وبتكون سهله يعنى الترم الاول أصعب من الترم التانى على الاقل 3مرات جبت فى الاول 3مواد امتياز وماده جيد جدا و2جيد

التانى واحده امتياز وواحده جيد جدا و4جيد

فرق السما من الارض بس الواحد بيتعلم

النتيجه

النتيجه ...النتيجه

ظهرت

الحمد لله جبت

جبت

جيد جدا

هيهههههههههههههه

بجد انا فرحان بجد عشان التقديرده والنتيجه بصفه عامه وعلى الماده اللى كنت شايلها بقالى سنتين دى

ماده التاريخ الهندسى اتفهه ماده فى الكليه فى الخمس سنوات

الحاجه الغريبه بقى ولا خليها فى البوست الجاى حاجه غريبه بجد

استنوا البوست الجاى

خواطر حب

الحب

عاطفه مشاعر احاسيس

عطاء تضحيه

مشاعر راقيه

الحب الحقيقى هو اللى يحلى مرار الايام

المشكله أن الحاجات دى كلها تديها لأى حد من غير ماتاخد بالك

مين اللى يستاهل المشاعر دى

مين ؟

من أول نظره غير لى سنينى

مستحيل

أزاى؟؟الحب من أول نظره مايبقاش حب

ممكن ارتياح أو اعجاب

أحيانا نحب فجأه أمتى وفين وازاى؟

أنت مع الحد ده كل يوم تقريبا أمتى المشاعر دى اتحركت؟

وبعدين

قوينى بيك قوى قلبى عشان يعيش

المشكله انه حيضعفه مش حيقويه

تبدأ المشكله بأحساسك أزاى أحب وأنا مش عارف

طباعها وأخلاقها و....و..الخ

احترت معاك معاك ودبت أنا فى هواك فى هواك

فعلا احترت

أحبك أكرهك أعلق نفسى بيك ولا أعمل فيك أيه

وبعدين لازم اتعرف عليها وعشان تمهد الطريق تبدأ تهتم بيها

من بعيد لبعيد

نظرات من بعيد لبعيد

وابتسامه غير مفهومه

ثم مرحله الاحتمالات

ياترى أنا فى بالها ولا مش فى بالها

تقول أروح بقى عشان اكلمها

وعلى كفى شلت قلبى يا قاتل يا مقتول

تتكلم ولا تخبى حيران فكرى ومشغول

تقعد تحضر تتكلم تقول ايه وتتخيل هى حتقول أيه

تروح تقعد تتدور عليها

بدور عليكى وسط العيون مش لاقى

بدور عليكى وسط القلوب مش لاقى

ولما تلاقيها ممكن تخاف وترجع تانى

أوتروح والموضوع يمشى وممكن يبقى رفض

معقول لا مش معقول

أو

بحب مهما كان الرد

على كلا الحب عاطفه يجب الحفاظ عليها

مشاعر الحب هى من اسمى وأجمل المشاعر

بلاش تضيع

فى النهايه أحب ان أشكر كل من الدكتور أحمد (مداح القمر) على أغنيه على كفى وصديقى حازم على أغنيه بدور عليك وللصدفه الجميله أنى ملحنهم الأثنين

تاااااااااااااااااااااااااااااااااااااااااااااااااااج

أنا طبعا الحمد لله ادبست فى تاج من نوران هو الصراحه مش تاج هما تلاته بس أنا حدمجهم فى تاج واحد بس

مين أحب شخصيه لقلبك فى الدنيا؟

طبعا بعد ربنا سبحانه وتعالى

وسيدنا محمد والصحابه

تقريبا بابا

انسان مستعد انك تضحى بحياتك-وركز فى كلمه حياتك- عشانه؟

طبعا مش حيبقى انسان زيى ويبقى كداب اللى يقول أنه مستعد يضحى بحايته عشان حد تانى

ممكن اضحى بحياتى عشان حد تانى بس مش عشانه ممكن عشان دينى أو وطنى لو هو فعلا أفيد منى عشانهم

انسان كرهته لدرجه الجنون وتمنيت لو تمسك سكينه وتنقض عليه وتغرزها

فى قلبه تقتله وتقف تبص لجثته وتشفى غليلك؟

أنا معنديش قلب أوى يعنى عشان أبص لحد أنا قتلته بس ممكن والله نفسى كان نفسى أقتل شارون قبل ما يموت

ما هو أجمل كتاب قرائته لبشر ومحتفظ بيه حتى الان؟ أنت متعلق

بيه وبتقراه كل فتره؟

مش بحب القرايه أوى مع أنى كنت بقراء كتير زمان بس دلوقتى مافيش

أهم جهاز منزلى أنت متعلق بيه وبتستخدمه كتير؟

التلفزيون والكاسيت والكمبيوتر

شئ تحس بالراحه النفسيه لما تنظر اليه؟

القمر منورفى غز العتمه فى الشتا

مكان تحس فيه بالحنين الى شئ لا تدرى ما هو وذكريات جارفه الى شئ؟

طب أزاى حنين لحاجه ما أعرفهاش وفى نفس الوقت ليه ذكريات

المكان هو جراند كافيه -الكفاتريا اللى جنب الكليه بتاعتى القديمه فى شبين قبل محول لهندسه تانيه

المكان ده بالنسبالى فيه ذكريات أكتر من الذكريات اللى ممكن تكون لبيتى نفسه

بجد ذكرياته وبكل مافيها كانت جميله

أجمل مدينه زرتها داخل مصر؟

أنا مش دايم السفر وماروحتش الاماكن اللى المفروض أنها أجمل اماكن فى مصر وبالتالى اسكندريه هى الاجمل

أجمل مكان طبيعى رايته فى مصر؟

تقريبا مافيش

لو اعتبرنا البحر مكان طبيعى يبقى هو أجمل مكان شفته فى مصر

لكن أجمل مكان فعلا شفته فى حياتى شفته فى الحلم

شخصيه كرتونيه بتحبها؟

مع انى مش بحب الكرتون اوى بس ممكن يبقى بابى

نوع هاتفك المحمول؟

ماتفكرونيش بالعمر اللى انا قضيته معاه

c200

بس حجيب واحد تانى قريب بس الموبيل ده عمرى ما حسيبوه بقاله معايا من زمااااااااااااااان

سرعه البروسيسور لجهازك؟

هى الرمات واحد ميجا

حجم ذاكره هارد جهازك؟

160جيجا

المساحه التى تشغلها المواد الاسلاميه على جهازك؟

كميه معقوله بس على الأسطونات كتير الحمد لله

نفس المسافه السالف ذكرها فى قلبك-الاجابه لنفسك عشان الرياء يا أخونا؟

أعتقد مافيش علاقه بين الاتنين بس طبعا فى القلب أكتر

أهم هدف أنت حاطه لحياتك دلوقتى؟

أنى أخلص الكليه بشكل كويس عشان أعرف أشتغل

وفى نفس الوقت أمشى فى موضوعين مهمين التلحين والتمثيل

كهوايه بمارسها وعايز أحترف فيها

عشان أحقق الهدف الاسمى من وجه نظرى من وراهم

أحب أحتفظ بالهدف لنفسى

مواصفات فتات أحلامى؟

فتات أحلامى بحبها وتحبينى أعتقد هو ده اللى أنا عايزه

واحده تحبنى وحبها

مواصفات أتمناها فيها

قلب كبير

جمال يريح القلب

احساس وروح جميله

مستوى اجتماعى وثقافى يتناسب معايا عشان التضارب

بتحب الاهلى ومش بتكره الزمالك

مش قولتلكم لازم يكون قلب كبير

وطبعا حاجات كتير لازم تكون متدينه وبتعرف ربنا

شعورك لما تسمع لمه مصر؟

لأ عادى

الحاجات دى كتير مش بتفرق معايا

لما تسمع كلام عن اليهود ؟

نفسى العالم يبقى من غيرهم

لما تشوف ظابط شرطه؟

تحيا مصر ياعم الحج

الشرطه فى خدمه .....ا

لأ

الشعب وأبو الشعب فى خدمه الشرطه

لون البطانيه اللى بتتغطى بيها فى الشتا؟

ثوانى لما أشوفها

مش لاقيها بس هى حمره على خفيف كده وعلى رسمه ورده بالابيض

أنا فاكر أن شكلها لذيذ

لون الجوارب والشراب المفضل لديك؟

ههههه رمادى

احساسك اذا داست رجلك ع مخلفات حيوانات-ولا مؤاخذه-؟

تفرق رجلى هلى اللى داست ولا أنا اللى دست برجلى وفى الحالتين ببقى قرفان أووووووووووووووى

بجد بتنرفز لو رايح أصلى فى الجامع ولا حاجه

أفكارك تجاه شاب ماشى فى الطريق لابس جلابيه بيضاء قصيره

وعمامه وله لحيه وبجيبه سواك وفى ايديه مصحف؟

أيه ده أنا حشوف السواك فى جيبه أزاى؟؟؟؟؟؟؟

بس والله بقول ربنا يهدينا كلنا بس أنا مش بحب كده أوى يعنى فى الزمن ده

مع أن كل ده سنه بس الصراحه فى ناس محبكاها شويتين اللحيه والقصير والسواك

ممكن يبقوا بشكل أجمل من كده بدون هرجله والحمد لله الناس بقى عندها ثقافه كويسه للموضوع ده

بالنسبه للى بيطبقوه

احساس يراودك فى اشاره مرور مغلقه بسب مسؤل كبير؟

هى الصراحه ما حصلتتش كتير

بس بدل ما يوقفوا طريق الناس عشان سعادتم يوصل مكانه

طب ما يعمل طريق مخصوص لنفسه وخلاص وبفلوس البلد

بدل اللى ....................ا

مين اكتر 6شخصيات بتحبهم؟

بابا وماما وأخواتى وأصحابى وجرانى والناس اللى ماشيه فى الشارع

أنا بحب كل الناس على رأى أحمد أدم

هل أنت سعيد؟

أنا متقلب المزاج فى أوقات كتير

لو أجتمعت أنت وحسنى مبارك فى مكان واحد هتعمل أيه؟

هههههههههههههههههههههههههههه

طيب

لو معايا مليون ونصف هتعمل أيه؟

اشمعنى نصف

ماشى النصف حتبرع بيه

والباقى حتجوز بيهم

ههههههههه

لأ وشغل الباقى

بتحب مصر؟

أه احيانا كتير

بس لو انطلب رقبتى عشانها حقدمها

لأ دأنا من بتوع الثوره يعنى

أنت مسلم؟

الحمد لله

ليه؟

ما أنكرش اتولد لاقتنى مسلم زى مأنا اسمى محمد

وبلدى مصر وحاجات كتير مسلمات

ممكن دلوقتى أغير كل حاجه البلد والاسم

بس الدين لأ

بس عشان مقنع جدااا بيه

مين أكتر شخصيه ما تقدرش تستغنى عنهم؟

ماما وبابا

أكتر موقف محرج؟

هههههههههههه

بلاش كنت واقف فى كافتريافيهاا بنات من دفعتى بعد الامتحان وأنا كنت واقف مع واحد صحبى الولدين الوحدين فى المكان وفجأه التلفزيون اتقلب على القناه التالته فى حد لسه بيتفرج على القناه التالته المهم

اللى بتشتغل هناك سابت الريموت ومشيت راحت مشوار

المذيع كان بيتكلم عن المشاكل الجنسيه للرجل

اللى يخرب بيت ده برنامج أنا وصحبى كنا خلاص بندمع من كتر الاحراج اللى كنا فيه

الامنيه اللى تتمنى تحقيقها؟

رايه الاسلام تعلى لفوق والحسره والموت للأخرين أصحاب الفتن

التاج يتمرر لمين؟

أخيرا خلصت

أحمد _مداح القمر_دودى_ ندى(change destiny)_بطوط(batoOot)_وأجدع واحد فى الشارع

رأى صواب يحتمل الخطأ

بدأت الموضوع ب(رأى صواب يحتمل الخطأ)لأنى شايف وجه نظر ناس كتير مش شايفاها

فى الفتره الأخيره كترت أوى المقارنات بين الهضبه عمرو دياب وتامر حسنى طبعا أنا كنت شايف أن ده نوع من أنواع التهريج لدرجه أنى كنت بجد كنت بضحك كنت فاكرها هزار لقيت الموضوع بجد والناس بتحب تامر أكتر من عمرو وعلى ميلودى ومزيكا كل الرسايل

أنا بموت فى تامر عشان أموووووور

أنا نفسى تامر يتجوزنى

تامر الصوت العبقرى

يتحوزك يتجوزك مين ياما هو تامر ده بتاع جواز ولا نيله ده أخره تلات أربع سنين قدام يقرفنا بأغنيه وبعدين يقعد فى بيتهم ويعنى هو لو مطرب محترم بيحب جمهوره كان المفروض يحترمه ويجتهد بدل الاستسهال اللى هو فيه ده أغانى كلامتها أقل كتير من أنها تبقى كلمات أغنيه أصلا وألحانه دى بقى حكايه عمركم شفتوا مغنى يسرق من نفسه لحن يعنى بيكرر نفسه فى أغنيه والعرب اللى بتحلى الاغنيه تدل على امكانيات اللى بيغنى كلها شبه بعضها وقليله جدا

ده مستواه الفنى المتدنى أما الاخلاقى دى بقى مش محتاجه كلام أنفسى أقتنع أن تامر كل البنات بتحبه كل مايطلع فى برنامج بنت تتصل بيه وتقريبا هى نفس البنت وتقعد تقوله تيامر أنا بموت فيك ونفسى أتجوزك وبعدين ينكسف وبعدين فى المسرح البنات نفسها تتطلعله أشمعنى البنات اللى بيقدروا يطلعوا والولاد لأ هى تعليمات للأمن البنات اه والولاد لأ ولا هو جاي البنات دول معاه عشان الدعايه وبيأكد كلامى الحفله الاخيره وفيلمه الجديد .

على النقيض تماما الهضبه عمرو دياب مستواه الفنى معلوش كلام حتى النقاض مايقدروش ينكروا أنه بيغنى بقاله 25سنه وألبوماته فى تصاعد فنى رائع

ولما مره الامن ضرب واحد عشان طلعله على المسرح رجعه تانى وسلم عليه وصالحه واحد بيغنى عشان بيحب الغنى مش عشان البنات تحبه

وبعدين ده واحد بيغنى من 25سنه والناتى 5سنين

البومات عمرو فوق العشرين البوم وتامر 3.5رسميا

الالبوم الاخير لعمرو والاخير لتامر المفروض ينهى المقارنه الفارغه دى خاااااااااااالص

يا رب تدوم أيامنا سوا ويبقى عطول جامعنا الهوا

يارب تدوم ايامنا سوا ويبقى عطول جامعنا الهوا

يارب نعيش هالحب اللى كان

وأحلى بكتير من الماضى كمان

يارب نعيش

يارب نعيش

سمات مصريه_1

الشعب المصرى بجد شعب رائع فى حاجات كتير أوى وشعب غريب أوى غى حاجات تانيه وشعب الرومانسيه والحب لهما من أهم الاشياء الى بيحبها بدليل كم المدونات اللى أصحابها بيكتبوا شعر عاطفى ورومانسى واللى مابيعرفش يكتب برده لازم يكتب بوست عن الحب ومدى أهميته فى حياته وفى نفس الوقت شعب الجد والعصبيه والمواقف الجاده كتير برده
شعب يحب ويكره فى أن واحد يبكى ويفرح فى أن واحد يلهو ويجتهد فى ان واحد ...فعلا شعب يستحق الدراسه .
فعلا فى برنامج (حبه عسيلى) اللى بيتعرض على OTV لما سال عن السمه المميزه للشعب المصرى تقريبا مافيش حاجه اتنين قالوها زى بعض ساعتها بجد عرفت ان الشعب المصرى شعب غزير مليان بجد
الضاهره الاولى : الشعب المصرى عمرك ما تحس بوحده
مره كنت مسافر لمصر ولما نزلت على المحطه كنت تعبان شويه بس عادى يعنى لوازم السفر بس روحت لسوبر ماركت وطلبت حاجه أشربها كده يمكن افوق شويه بس بجيب الحاجه لقيت واحد أنا ماعرفوش بيقولى لأ بلاش تاخد خد دى فبصيت له كده وزانا مستغرب شويه فقالى ولا اقولك خد دى بلاش اللتنين دول كمان وبأبتسامه جميله منه كده خلتنى فعلا ايتسم انا برده وبعدين قعد يهزر معايا بخفه دم مصريه ميه فى الميه خلانى فعلا أفوق كتير أوى وبعدين هو مشى وأنا مشيت .
يعنى هو رسم الابتسامه على وجهى وورسمها برده على وجهه يعنى استفاد وفاد

ده بقى موققف من ضمن ميت موقف حصل بنفس الشكل..طبعا مش ديما بيبقى مواقف جميله لأ فيها المواقف اللى ماتنفعش خالص يعنى

البوست اللى فات كنت كاتبت أغنيه وطلبت أن اللى يقرأ البوست ده يقول أيه اللى فهمه من الاغنيه دى تتقريبا ما فيش حد فهمها زى مأنا عايز والاغلبيه فهموها بالشكل الرومانسى شويه أنا كنت عايز أكتب أغنيه ممكن تتعمل فيلم يعنى فكره جديده لحد ما

واحد بيحب واحده من بعيد لبعيد وبيشوفها كل فتره كده وديما متردد فى أنه يأخد خطوه عشان يكلمها ويقولها على اللى جواه وبعدين هى سافرت وقعدت فتره مسافره.

طبعا هو كان حيتجنن هى فين راحت فين لاقى واحده شابهها هى نس الشكل بس متغيره الى حد ما بس أقنع نفسه انها هى دى

راح وقال لازم يأخد بقى الخطوه اللى أجلها من فتره كبيره وخاف لتضيع منه تانى

راح وكلمها لاقها معجبه بيه وطبعا هو حقق اللى هو عايزه أنه حبها وحبته

وفى يوم وهو ماشى معاها لاقى البنت اللى كان بيحبها واقفه قدامه أتاريه راح وكلم واحده تانيه والبنت اللى بيحبها بجدكانت برده بتحبه ورجعت من السفر وظهرت وكان فى بالها أنه لسه محافظ على حبه

هى دى الفكره المقصوده من الاغنيه اللى فاتت هى فكره نادره الحدوث بس ممكن تحصل بس لو حصلت أيه الحل

يوم الاحد سيتم (انشاء الله ) تكريم الاهلى كبطل للدورى المصرى للسنه الثالثه على التوالى

الرجاء اختفاء الزمالكويه يوم الاحد من على المدونات ويكون يوم عيد لجماهير النادى الاهلى

وكل أهلاوى يعمل تهنئه فى مدونته

حب من طرف تالت

انمبارح وأنا قاعد فاضى كده جات فى دماغى فكره حب مختلفه أوى وممكن تحصل بس حتبقى نادره الى حد ما وقولت لازم أكتب عنها دلوقتى مسكت القلم وكتبت:

ياه شوفتك بعد زمان كنتى فين وبعدتى ليه

وصورتك مالها كده أتغيرت كده ليه

كان ليه البعد من الاول

كان ليه العذاب والحيره

أديك رجعت من تانى

مشتاق وفى عنيك الحيره

قولت مش حسيب الحب من بعيد لبعيد

لازم يبقى فى خطوه تقرب البعيد

مش حسيب الحب يتوه تانى

لازم أروح وقولها

وكلمها عن حبى وحنانى

روحت وكلمتها

صوتها متغير بس حاسس بحبها

وفى يوم وانا ماشى معاها

شوفت خيالها قدامى

بتبصلى وبسحر عنيها بتنده وبتسأل

مين اللى جنبك ديه

حبيبتك قول يالا جاوبنى

بصيت جنبى وقدامى

لاقيت فوله واتقسمت نصين

وأتارى فى الدنيا حاجه منها اتنين

وأتارى الصوره ما أتغيرتش

موجوده ولحبها ما نسيتش

وعلقت حد تانى معايا

والحكايه لسه ما خلصتش

وأدى أخره الحب من بعيد لبعيد

كان لازم من الاول يبقى فى خطوه تقرب البعيد

ملحوظه :أنا كتبت الفكره وماركزتش بالمره فى طريقه الكتابه والكلمات اللى توضح المعنى بس حبيت أقول الفكره مش اكتر

سؤال بقى: ما هى الدروس المستفاده من الموضوع ده ....أيه اللى أنا بقوله ده هو درس عربى قصدى يعنى أكتب اللى فهمته من الليله دى ...قصدى برده القصه هى أيه عشان ناس كتير ما فهمتهاس بالشكل اللى انا كنت عايز أوصله فأنا عايز أعرف الفكره وصلت لمين مظبوطه .

وساعات ما بفهمكيش

أوقات يا دنيا معاك بعيش وساعات مابفهمكيش وأنت ولا فهمانى

طول عمرى بحب الاغنيه دى جدا وجدا جدا اللى بيغنيها محمد فؤاد والمؤلف مصطفى كامل حاجه من أجمل الحاجات اللى عملها فى حياته وديما مستغرب كلمه وساعات ما بهمكيش ديما بقول أيه ساعات ما بهمكيش دى كلمه غريبه أكتشفت أنها كلمه عميقه جدا وكلها معانى .

فعلا كتير أوى الواحد يبقى بمليون حاله فى وقت واحد مش فاهم هو ماله المفروض يعمل أيه وأيه اللى مفروض ما يعملوش

طب اللى عمله ده صح..

لأ اللى عمله ده غلط

والمهم أنه مش حيوصل لحل نهائى

الفكره تايه جواه

مش عارفلها بدايه ومش لقيلها نهايه

كده وصل للمعنى المطلوب وساعات مابفهمكيش عشان مش فاهم نفسه فى الاصل

مافيش صوت

بسم الله الرحمن الرحيم

أنا بل أنت بل نحن الشعب المصرى ...لأ لأ الشعب الاسلامى لأ والعربى

ندين بشده ونستنكر بكل شده ما حدث من اذاعه اسرائيل للفيلم الوثائقى والذى يتظمن قتل الاسرى المصريين فى حرب 67

الحمد لله ما فيش فى أدينا غير أننا ندين بس مش أكتر

عارفين ليه عشان مانقدرش نعمل حاجه غير كده مش قادرين نأخد قرار لأننا مش حنعرف نأخد قرار ..خوف ..ضعف ..غباء .

على كلا ما عدتش تفرق اللى مات مات من 40سنه بس السكوت معناه الرضا يعنى مش بعيد يحصل فينا اللى حصل فينا قبل كده امبارح ..انهارده ..بكره ولا حتى بعده.

جمله جميله أوى قالها هانى سلامه فى فيلم حاله حب وهو بيكلم شريف رامزى لما كان هربان قاله أنت عارف ليه أنت مش حتقدر تده للناس دول عشان يضربونى مش عشان عارف أنك غلطان

لأ عشان أنت ما بقاش فيك صوت تنده بيه أصلا

أحنا معندناش صوت نتكلم بيه حتى

وعد العيون

حان الوقت لتفسير لماذا أخترت (وعد العيون) على الرغم من أنه من الاسهل والاجمل (كلام العيون) كما قال صديقى(مداح القمر) وظل يمدح فى كلام العيون وتلك المناقشه التى طالت بيننا أنا وهو وصديقنا الثالث حازم.
أنا أخترت هذا الاسم قبل أن يطرح هذا الموضوع فى الاساس ولكن عندما حان وقت المفاضله بين الاتنين أخترت وعد العيون لأنها أدق وأعمق .
كلام العيون غير دقيق بالمره ربما يفلح مع البعض وربما لا فى كلام العيون يكون مجرد كلام بين أتنين ربما لم يكلما بعض من قبل وبالتالى فهو مجرد كلام فى أغلبيته غير صحيح يفسر أحد الاطراف الكلام كما يريده بدون وعى أو تأكد من الكلام أصلا.
لكن الوعد فهو الاعمق ياتى بعد الكلام بفتره والكلام بالسان وليس كلام العيون وبالتالى فهو يكون حقيقى وصادق ويصل من القلب للقلب.
يكون له أساس صريح مبنى عليه هو أساس الصراحه والوضوح.
بقى أنى أقول:
وعد العيون أصدق وعود الحب

الكلاب والامير

اليكم هذا النبأ الهام من جريده الجمهوريه يوم لاثنين الماضى الموافق 19من فبراير تحت عنوان

فى حادث الكلاب بفندق موفيمبيك

والده حبيبه :الكلاب افترسى ابنتى والحراس بتفرجون

بدأت نيابه 6اكتوبر أمس تحقيقاتها فى حادث الكلاب الأمير تركى بن عبد العزيز على الطفله حبيبه سعيد محمد السيد (7سنوات)داخل فندق موفيمبيك مدينه 6أكتوبر وتبين ان ثلاثه كلاب هاجمت الطفله داخل حديقه الفندق أثناء لعبها فى المراجيح مع شقيقتها الصغرى فرح (5سنوات)وعضتها فى وجهها وأماكن أخرى بجسدها بينما وقف حارسهم فى احدى الشرفات واكتفى بالفرجه.

كان قد أصحب الدكتور سعيد محمد السيد مع زوجته وبناته الثلاثه التى أكبرهم هى حبيبه ليقضوا عيد الحب فى فندق موفيمبيكبينما كان يلاعبا الطفلتين حبيبه وفرح وفجأه وبدون أى مقدمات هاجم الثلاثه كلاب على الفتاه حبيبه ولوا رعايه الله لهاجمت الطفله الصغيره أيضا

وصف الاب بأن عيد الحب تحول الى حزن شديد بسب كلاب الأمير.

عايز أفهم يعنى سعادته سمو حصره البنى أدم الامير ده جاى مصر عشان (يتفسح فى أم البلد دى ) جايب معاه الكلاب دى ليه انشاء الله

ولما أنت جايب أصحابك الثلاثه معاك وسايهم كده ليه أنت ما سمعتش عن أن الكلاب بتعض ولا أنت صحيح أمير ما جربتش ألم عضه الكلب الواحد تخيل بقى-لو عندك قدره على التخيل-ثلاثه كلاب.

هكذاضحيه-جديده أدعوا لها بالشفاء-من ضحايا الامراء اللى فاكرن نفسهم مش بشر زى باقى الناس ضحيه جديده تماما مثل ضحيه الامير القطرى اللى موت أسره مصريه على طريق المطار سافر لبلده من غير ماحد يقوله بتعمل أيه أصلا ؟واتحكم فيها الطالب المصرى

هى سلسله وان تنتهى طالما الموضوع بيعدى وكله عادى

عادى

حاله حب

حاله حب


قد يستغرب البعض (حاله حب) ليه و ازاى وامتى ؟ الفيلم أتعرض من سنتين وابطال الفيلم عملوا أكتر من فيلم بعده ليه الفيلم ده بالتحديد؟


أقولكم ليه الفيلم ده عن غيره _وانا لا أعيب على غيره_ولكن الفيلم ده من وجه نظرى أحسن فيلم أتعمل من أربعه أو خمس سنين الفيلم ده أول مره أشوفه كان من سنه ونصف تقريبا ويوم ماشفته كنت فى سيبر جنب الكليه وقولت حتفرج على شويه من الفيلم حتى معاد المحضره


من أول خمسه دقايق من الفيلم خد القرار مافيش محضره النهارده وقولت أعوضها فى يوم تانى وخلاص المهم أنى قاعدت أتفرج على الفيلم وبدأت ادخل فى جو الفيلم أوى وشدنى للفيلم كل حاجه اولا الاخراج التحفه وجو الفيلم وقصه الفيلم لدرجه أنى شفت الفيلم ده لأكتر من عشر مرات على الاقل وعمرى مامليت منه

الاخراج لسعد هنداوى (أول تجربه اخراج).

التأليف لأحمد عبد الفتاح

البطوله لهانى سلامه وتامر حسنى وهندصبرى وزينه وشريف رمزى ودنيا وعمرو ممدوح
الفيلم تم تصويره فى الاسكندريه وباريس وفى الشتا طبعا الجو مش محتاج كلام فى المدينتين دول بالتحديد والصراحه جامدين أوى فى التصوير
نبدأ من البذره الاولى للفيلم القصه تثير مشكله الهجره الداخليه والخارجيه الهجره ...الخارجيه الممثله فى عمرو ممدوح والداخليه الممثله فى دنيا وشريف رمزى والقصه الفرعيه هى قصه التفكك الأسرى
يبدأ الفيلم بأسره تسكن مدينه الاسكندريه الام (مها أبو عوف)والطفلين سيف (هانى سلامه)ويوسف(تامرحسنى)بدأت أحلام الهجره تراود أحلام الاب يريد الخروج بفنه الراقى (الرسم)من بلد ه التى لا تقدر الفن الى بلد أخرى تقدر فنه وتساعده للوصل الى النجاح والشهره أيضا ولكن الام رفضت الفكره بشكل قاطع حيث والدها الذى راودته نفس الاحلام وعاد الى وطنه فى النهايه ميتا فى صندوق خشبى رفضت تمام هذه الفكره لكن الاب وضعها أمام الامر الواقع بعد حجزه للتذاكر ولكن الام ظلت عند موقفها رافضه تمام فاخذ معه ابنه سيف وسافر بيه تشعر الام بهذا الا بعد ان فات الوقت
تمر السنين الى قاربت العشرين سنه ويكبر سيف ويوسف ويفشل الاب فى عمله فى باريس حتى انه ظل يطوف فى شوارع باريس لكى يكسب بفنه اى شئ يعينه على الحياه وكان أمله الوحيد فى ابنه سيف كى يعوض بيه ما خسره هو من غربه وفشل... فأصبح سيف مخرجا فى باريس ويحب فتاه من أصل عربى عرفها هناك تدعى حبيبه(هند صبرى)وهى صحفيه فى جريده فرنسيه.
بينما الام تنجح نسبيا فى مصر ولكن ليس بالقدر الكافى وكان ابنها يوسف مازال فى الجامعه ولكنه يغنى فى بعض الاماكن لحبه للغناء وأيضا لجمع المال وكان صديق يوسف هو أدهم(شريف رمزى) طالب فاشل فى كليته لا يعرف شيأ فى حياته سوى المخدرات والبنات والموسيقى لدرجه جعلت أصدقائه يبعدون عنه
بينما يوسف يغنى فى أحد الاماكن التى يغنى بها رقصت معه فتاه جميله(زينه) كانت بالصدفه تعمل فى نفس المكان فاعجب بها وتمنى لو يكلمها ويعرف من هى ولكنها تبخرت من امامه مجرد انتهاء الاغنيه وهو ما دعاه ليبحث عنها حتى وجدها
نعود مره أخرى لباريس حيث سيف جالس فى أحد الاماكن العامه منتظرا حبيبه شاهد مجموعه من العرب يختلفون مع بعض وتصاعد الحديث بينهما حتى الضرب بالايدى تدخل سريعا سيف وأنصف المصرى الذى كان فيهم وهو عمرو (عمرو ممدوح)الشاب المصرى الذى كان بينهم.
عمرو هو شاب مصرى حاول الهجره على حد تعبيره تسعه وسبعين مره ودائما كان الجواب بالرفض لعدم وجود له اى وظيفه خارج مصر وطبعا ولا داخلها وفى المره التمانين سافر فى رحله مع الكليه وهرب منهم وظل هاربا فى باريس تتخبط بيه حوائط باريس وفى فتره قصيره وتمكن من عمل باسبور مضروب وأقامه مضروبه فأصبح مطلوب من الشرطه ورجال التذوير وغيرهم فضاقت الدنيا بيه لدرجه جعلته نادما على هذا السفر
كان صديقه الوحيد فى باريس هو سيف الذى طلب منه أن يأخد جوابا ويجعله فى أمانته حتى اذا مات يسلمه لأهله فى مصر تأثر سيف لما يعانيه عمرو صديقه وكان دائم الشكوى لحبيبه وكانت حبيبه لانها صحفيه واقعيه لحد كبيركانت تذكره بأن ما فيه عمرو خطأ كبير ويجب أن لا يكون كل المهاجريين بهذه الصوره
فى موقف يدل على مدى العنصريه فى فصل سيف من قائمه المرشحيين للعمل فى حمله دعائيه كبيره اثارت غضبه بينما هو فى قمه غضبه تذكر صديقه عمرو وأراد ان يذهب اليه
ذهب سيف لبيت عمرو ليجد شخصا ما يحمله رجال الاسعاف ورائحه كريهه جدا فسأل سيف من هذا لتقول له أحدى الساكنات بالمبنى انه الشاب المصرى الذى يستقل الدور العلوى
لتكون الصدمه الكبرى فى حياه سيف وهى ما تجعله يبوح بالسر بانه يريد العوده لمصر ليبحث عنه أخيه يوسف
ثم نعود مجددا الى الاسكندريه لنجد يوسف يتعاقد مع احد المنتجين الذين يريدون فرض عليه اسلوب معين فى الاغانى واللوك ونوع الموسيقى وهو ما يرفضه تماما معللا ذالك بأنه يريد أن يقدم موسيقى مصريه كما هو موجود موسيقى يونانيه وفرنسيه و أسبانيه وعندما تخلى عنه أعضاء فرقته جاء فى ذهنه أخيه سيف وأراد ان يبحث عنه
أدهم صديق يوسف كان دائم التعرف على البنات عن طريق الشات فتعرف على فتاه أمريكيه الجنسيه تدعى ليندا(دنيا) ووعدته بأنها ستسافر لمصر فى زياره حيث ان والدتها والدها مصرى والدتها أمريكيه وانها ستعود الى أمريكا وستساعد أدهم على السفر معها الى امريكا وهو الحلم الذى
يراود معظم شباب هذا الجيل
لتأتى ليندا الى مصر ولجمالها الذى شد كل من فى المطار جعل ادهم يحبها من أول نظره ولكنها لا تعترف بالحب خالص هى قادمه لهدف معين ومن قبيل الصدفه كانت متفقه ليندا مع شخص اخر تعرفت عليه عن طريق الشات
معرفه أدهم لليندا لم يرضى عنها يوسف وأخذ يحذره منها لأكتر من مره لانه كان شاكك بدرجه كبيره فيها هى مين ومين وراها لم ينتبه لكلامه أدهم وخسر والده عشانها وأضطر للعيش معها فى بيت صديقهم التالت اللى كان معاهم فى المطار
دخل أدهم فى دوامه مع تلك الفتاه ليندا جعلته يدمن ويتاجر فى نوع من المخدرات والتى جائت بها من أمريكا معها وهو كان هدفها الاساسى من زيارتها لمصر وهذه هى خطوره الهجره الداخليه
ياتى معاد الطائره التى سافرت من باريس متجه الى القاهره وتحمل فيها سيف وحبيبه لثلاثه أسباب الاولى ليوصل الامانه التى تركها عمرو معه والثانيه ليبحث عن أخيه وأمه والثالثه أن يصور فيلم تسجيلى عن مشكله موجوده فى مصر
كانت رحله البحث عن اخيه ومكان سكنهم شئ صعب للغايه حيث جاء الزلزال ليهدم مسكنهم القديم واخذ يبحث عنهم حتى حصل على بعض المعلومات عنهم وهى أن اخوه يغنى فى بعض الحفلات ويتردد كثيرا على كافتريا معينه وكانت حبيبه بجوار سيف دائما تحاول ان تشد من عزيمته وأن لا ييأس من البحث عن أخيه
أهم مشهد فى الفيلم:حيث يذهب سيف للكافتريا وبالصدفه يوجود فى نفس المكان أخوه يوسف ولكنه لم يراه بينما كانت حافله عيد ميلاد صاحبه الكافيه وطبعا كان يوسف يعرفها جيدا حيث انه يعرفها منذ صغره ويعطيها يوسف هديه عيد ميلادها وهى CDلموسيقى يحبها وكان يرقص عليها هو وأخيه وهم صغيرين وقى نفس الكافيه
كان سيف دائما يحب التصوير فصور الحاضرين فى المكان بالكاميرا كعادته وهو ما جعل صاحبه الكافيه تعزمه على ان يرقص معهم وكان بين يوسف وسيف صاحبه الكفاتريا فقط
عندما جائت عين سيف فى عين يوسف حس بان هذا الشخص الذى كان يحمل جيتار هو يوسف الذى يبحث عنه وفى نفس الوقت حس يوسف بأن هذا الشخص الذى كان يصورهم صاحب الشعر الناعم الطويل هو سيف أخوهولكنه تردد بعض الشئ وكان مشهد العيون بينهم طال لبعض الوقت ولأنهم وهم صغيرين كان يرقصوا تحت المطره كانت فى نفس الوقت المطره تسيل خارج الكافيه جرى يوسف وسيف تحت المطره ليعرف كل منهم أن الاخر هو أخوه وسط دهشه كل الموجودين وكان المشهد قد صورته حبيبيبه بالكاميرا

المشهد ده واحد من اكتر من مشهد مستر سين فى الفيلم

ذهب بعد ذلك سيف ويوسف وحبيبه وريهام(زينه) الى البيت ليكون اللقاء الثانى الصعب بالنسبه لسيف والدهشه الاكبر للأم فى مشهد قوى جدا

ثم تبدأ علاقه الاخوه تبدا من جديد بينهم فى طريقه اخراجيه رائعه

يذهب كل أبطال الفيلم تقريبا الى الحفله التى نظمها أحد أقارب ليندا والتى أثرت دهشه سيف وحبيبه حيث انهم لم يتوقعوا أن اللى يحدث هذا يمكن أن يكون موجود فى مصر حيث ان ادهم وليندا وصديقهم (حسام) كانوا يوزعون نوع من المخدرات خطير

هذا اليوم انتهى باحساس ريهام أنها مجرد واحده زى اى واحده ممكن أن يعرفها يوسف وهو ماجعلها تغضب منه

كان حلم سيف ان يسمع كل الناس صوته بالطريقه التى يريد الناس ان يسمعوه بها وكان يحتاج مساعده وهو ما جعل سيف يساعده وينفذ له طلبه عن طريق علاقاته بالخارج وهو انه اتفق مع قناه فرنسيه مشهوره على ازاعه له حفله فى نهايه يوم سيتم تصوير القناه لمده اربعه وعشرين لكل الاماكن فى مصر

أرد سيف ان ينزل وسط البلد لأن حبيبه تنتظره هناك وفى الطريق رأى سيف مجموعه من الأطفال فى الشارع وهو ما رأه موضوع فيلم قصير رائع يناقش فيه مشكله أطفال الشوارع فى القاهره أو مصر بشكل عام

أخذ سيف الكاميرا كعادته وصورر هذه الاطفال وهو ما أغضب الناس فى الشارع وأخذوا منه الكاميرا وكانت مشاجره تدخل فيها البوليس

وهناك قال سيف ان معه تصريح تصوير وهو طبعا ما جعلت القاضيه فى صالحه

فى البيت كان سيف ثأرا جدا وقال انه فى مجتمع همجى وهو ما لم يقبله بالطبع يوسف لان يوسف يعتبر أخوه فرنسى أكتر منه مصرى

وقال له انه ليس بالضروره أنه دافع عنه فى الشارع أنه موافق على ما فعله وأن الفرنسيين يلعبون بيه وبالتالى قامت مشاجره حاده بينهم وأنتهت بالخصام وترك يوسف للبيت وذهابه مره أخره مع حبيبه الى الفندق الذى يقيمون به

فى هذه الاونه كان ادهم وليندا وحسام يحضرون لحمله كبيره فى توزيع المخدرات وأثناء تويعها فى أكتر من حفله تم القبض على مجموعه من الذين يوزعزن هذه الخدرات وهو ماجعلهم فى مهب الريح امام الحكومه وهنا كلن لابد من اختفاء الثلاثه أصحاب القضيه ولكن ليندا كانت قد قامت بدورها بالكامل وقالت انها لازم تسافر الان وهى بالتالى وضعت أدهم وحسام فقط أمام البوليس

قامت مشاجره بين ليندا وادهم أنتهت بأصابه أدهم فى رأسه

وهروب ليندا وسفارها

اتصل أدهم بصديقه يوسف وطلب منه ان يذهب اليه بالسياره ضرورى

ذهب اليه يوسف وهناك لم يتكلم أدهم عن ما حدث ولكنه طلب من يوسف أن يقود السياره بنفسه وتكررت أساله يوسف أيه يا ابنى اللى حصل ؟ وأيه الجروح اللى وجهه دى؟ وليه طلب السياره لم يجاوب عليها ادهم وعندما وصلا أمام لجنه كسر أدهم اللجنه لان معه المخدرات كما انه مطلوب من البوليس

بالطبع قامت مطارده بينهم مع البوليس وهرب منها أدهم (نط من العربيه)وترك يوسف بها وبالتالى أتمسك يوسف

طالبت والده يوسف من سيف أن يلحق اخوه قبل الحكم عليه

طالب سيف من يوسف أن يتوقع مكان يختبأ بيه أدهم

ذهب سيف الى المكان وفى قريه ريفيه وبحث عنه ووجده وتمكن من ان يغلبه نفسيا وأثر عليه وأقنعه بتسليم نفسه

وخرج يوسف من السجن (زى ماخرج برده فى الحقيقه تامر) وغنى فى الحفله أغنيه (هى ايه الحياه)

وغير سيف فكره الفيلم حيث أنه قال انه سيبحث فى كل مكان ليه الناس اللى زى عمرو وأدهم عايزين يسافروا

وانتهى الفيلم بأغنيه هى ايه الحياه

أول تاج

تفضلت دودى- الاهلويه الكبيره -زى طبعالأن مصر كلها أهلويه والباقى اهلويه بس مخبيين
ماعلينا تفضلت دودى بارسال تاج لى واحنا لسه خارجين من الامتحانات بس يالا:
أيه اللى حيصل لأميلك لما تموت ؟
الاميل ماحدش حيبعت ليا حاجه بعد ما موت
أما المدونه الجديده فهى أتولدت معايا تقريبا قبلى بكام يوم يعنى ولو مت حتموت معاياونبقى من عمر بعض مع أنى اكبر من المدونه ب19سنه
أديت الباسورد بتاعك حد قبل كده؟
أه لناس محدوده جدا
لو اه كانت طبيعه العلاقه به أيه؟
والله خد فتره ماعمال مافهمت السؤال علاقه أيه اخويا وابن عمتى(مداح القمر)بس هما دول بس
أسمى؟
محمد على الحداد
اسم الدلع المشهور بيه وسط اصحابك؟
أنا مش بحب الدلع خالص وخصوصا يعنى انى ولدممكن بقى للبنات يبقى أه
بس الاسم المشهور بيه هوديل بيرو حتى الاسم ده ملبقتش حب يقوله ليا عشان انا بحب أسمى
عمرك؟
يوم السبت الجاى حيبقى 19 بالملى
برجك؟
والله قرتها أول مره برجلك ما بقتش فاهم حاجه
أنا برج الدلو بس أنا مش بعترف بالأبراج
مجال دراستك؟
الهندسه الالكترونيه
شخصيتك نوعها أيه؟
تصدقوا مش ماقدرش أوصفها
بس ممكن تكون هاديه لحد كبير بس لما بتضرب بتضرب خالص
المود بتاعك أيه؟
زى ماقولت فى شخصيتى هادى لحد كبير
وقت فراغك بتعمل فيه أيه؟
بقرأ قرأن
وبلحن وأرسم
الاكله المفضله؟
المكرونه بالبشمل و...و....و..أنا اصلا مش بحب أكل كتير
الصفات اللى أخدتها من بابا؟
بعيدا عن السؤال شويه أنا شبه بابا أوى
بحب الكوره زى بابا والقرايهوالتفكير الكتير وتحمل المسؤليه
الصفات اللى أخدتها من ماما؟
الطيبه والحب
أكتر 6حاجات بتكرها؟
الغباء
اللف والدوران
الناس اللى بتنحشر لوحدها
الغرور
الناس اللى مش بيتعملوا بطبيعتهم
الزمالك
أكتر 6حاجات بتحبها؟
الله سبحانه وتعالى
سيدنا محمد
وطنى


لازم فاصل كبير وبعدين نكمل:
النادى الاهلى
محمد فؤاد
التلحين والرسم
الشغل بالنسبالك أيه؟
حاجه بتاعت ربنا والله الواحد يجتهد فى الكليه وربنا يوفقه بعد كده
الكمبيوتر بالنسبالك أيه؟
حاجه بكرها جدا للأسف لأ وكمان أنا مهندس الكترونيات يعنى ليا علاقه واضحه وصريحه بيه
الخمس حاجات اللى محدش يعرفها عنك؟
أنى بفكر كتير
بحب بجد
صاحب صحبى
رومانسى بس فى وقت محدد(فى وقتها).
متقلب المذاج
خمس أشخاص تمرر ليهم التاج؟
مداح القمر
الساحر
نوران
ايبيتاف
وندى

الدنيا ظروف

الحمد لله المدونه القديمه شلتها غصب عنى ومدونه جديده أتعملت بعنوان برده غصب عنى مش عايزه
يالا الحمد لله الواحد كأنه حيبدأ من الأول الذاكره القديمه ذهبت مع الريح
ححأول أجيب أخر حاجه كتبتها تانى لأن فى واحد صحبى وهو الدكتور أحمد تقريبا حفظ أخر موضوع ليا يارب أعرف أجيبه وكأن مافيش حاجه حصلت
عموما مافيش حاجه أكتبها غير الحمد لله على كل حاجه
سلاااام